UN-Habitat: Dünyada 1 milyarddan çox insan ağır yaşayış şəraitində yaşayır

Dünya iqlim böhranı, münaqişələr, məcburi köç və sosial bərabərsizliklər fonunda sürətlə urbanizasiya dövrünə daxil olur və bu şəraitdə hər kəs üçün əlçatan mənzil təminatı əsas qlobal çağırışlardan birinə çevrilib. Bunu BMT-nin Məskunlaşma Proqramının (UN-Habitat) icraçı direktoru Anaklaudia Rossbax bildirib.

Bakıda keçirilən Ümumdünya Şəhərsalma Forumunun (WUF13) açılışında çıxış edən Rossbax qeyd edib ki, hazırda dünyada bir milyarddan çox insan su, sanitariya, elektrik enerjisi, təhsil və layiqli iş imkanlarına məhdud çıxışı olan ağır şəraitdə yaşayır.

“Bu, insanların böyük əksəriyyətinin yaxın gələcəkdə şəhərlərdə yaşayacağı bir dünyadır. Gənclərin, yaşlıların, miqrantların və aztəminatlı insanların yaşamağa çətinlik çəkdiyi şəhərlərdən danışırıq”, – o deyib.

UN-Habitat rəhbəri vurğulayıb ki, şəhərlərdə sosial parçalanma dərinləşir, daha çox insan küçələrdə və qeyri-rəsmi yaşayış məntəqələrində yaşamağa məcbur olur.

Rossbax bildirib ki, Bakıda keçirilən forum məhz bu problemlərin həlli yollarını müzakirə etmək üçün mühüm platformadır.

“Bu qeyri-müəyyənlik, sabitsizlik və dağıntılar dövründə əsas sual budur: adekvat mənzil hamı üçün necə əlçatan edilə bilər?” -deyə o əlavə edib.

O, son günlər Azərbaycanda müşahidə olunan güclü yağış və qasırğalara baxmayaraq forum iştirakçılarının həmrəylik nümayiş etdirdiyini və tədbirin uğurla davam etdiyini qeyd edib.

“Şəhərlərin də ehtiyacı olan məhz budur – dayanıqlıq, qətiyyət və ortaq məqsəd hissi”, – Rossbax bildirib.

Gülnar Nazimqızı