Türkiyədə vətəndaşlara dövlət zəmanəti ilə aşağı faizli ödəniş imkanları təqdim olunur

Adil Karaismayıloğlu: Türkiyənin sosial mənzil siyasəti ədalət və təhlükəsiz şəhərsalma üzərində qurulub

Türkiyədə sosial mənzil siyasəti aztəminatlı və orta gəlirli ailələr üçün əlçatan, təhlükəsiz və dayanıqlı yaşayış mühiti yaratmağa yönəlib.
Bunu Türkiyə Böyük Millət Məclisinin deputatı Adil Karaismayıloğlu bildirib.

Onun sözlərinə görə, Türkiyədə Kütləvi Mənzil İdarəsi sosial mənzil tikintisində güclü və mərkəzləşdirilmiş icra mexanizmi formalaşdırıb.

Karaismayıloğlu qeyd edib ki, sosial mənzillər yalnız yaşayış binaları kimi deyil, məktəb, səhiyyə müəssisəsi, ibadət yeri, park, nəqliyyat bağlantıları və ticarət obyektləri ilə birlikdə planlaşdırılır.

“Bu yanaşma konut siyasətinin eyni zamanda sosial ədalət siyasəti olduğunu göstərir”, - deputat deyib.

O bildirib ki, Türkiyədə vətəndaşlara dövlət zəmanəti ilə uzunmüddətli və aşağı faizli ödəniş imkanları təqdim olunur.

Deputat əlavə edib ki, 2023-cü il zəlzələlərindən sonra Türkiyə 11 vilayətdə genişmiqyaslı yenidənqurma işləri aparıb və indiyədək zəlzələ bölgəsində 500 minə yaxın müstəqil bölmə tikilərək ehtiyac sahiblərinə təhvil verilib

Gülnar Nazimqızı