Məktəblərdə TikTok platformasına çıxış bloklanıb - Nazir müavini

Uşaqların rəqəmsal mühitdə təhlükəsizliyinin təmin olunması məqsədilə məktəblərdə bir sıra məhdudiyyətlər tətbiq edilir. Bunu elm və təhsil nazirinin müavini Firudin Qurbanov Milli Məclisdə çıxışı zamanı bildirib.

Qurbanov bu barədə Milli Məclisdə yaş məhdudiyyəti tətbiq edilən sosial şəbəkə platformaları ilə bağlı qanun layihəsinin müzakirəsi zamanı danışıb.

Onun sözlərinə görə, son illərdə bir çox ölkələrdə uşaqların sosial şəbəkələrdən istifadəsi qanunvericiliklə tənzimlənir və postsovet ölkələri də beynəlxalq təcrübəni öyrənərək müvafiq addımlar atırlar.

"Elm və Təhsil Nazirliyi olaraq məktəblərdə bəzi məhdudiyyətlər tətbiq edirik. TikTok platformasına çıxış bloklanıb, şagirdlərin internetə çıxışı filtrasiya olunur", – Qurbanov deyib.

Nazir müavini əlavə edib ki, məktəblərdə istifadə olunan internet şəbəkələrində 200-dən çox riskli və ya təhlükəli mövzu üzrə məhdudiyyətlər tətbiq olunub.

Qurbanovun sözlərinə görə, bu tədbirlər uşaqların zərərli məzmunlardan qorunmasına və rəqəmsal təhlükəsizliyin gücləndirilməsinə yönəlib.

Gülnar Nazimqızı