Vaxtı keçmiş kreditlərin həcmi 2% olub

Azərbaycanda bank və digər kredit təşkilatlarının kredit portfeli 2026-cı il mayın 1-nə olan vəziyyətə görə illik müqayisədə 9,1% artaraq 32,6 milyard manata çatıb. Bu barədə Dövlət Statistika Komitəsinin beş aylıq hesabatında deyilir. 

Hesabatda bildirilir ki, kredit portfelinin 26,6 milyard manatı və ya 81,7%-i uzunmüddətli kreditlərin payına düşüb.

Məlumata görə, verilmiş kreditlərin 93,8%-i banklar, 6,2%-i isə bank olmayan kredit təşkilatları və kredit ittifaqları tərəfindən rəsmiləşdirilib.

Eyni zamanda, vaxtı keçmiş kreditlərin həcmində artım qeydə alınıb. Hesabat dövründə problemli kreditlərin məbləği ötən ilin eyni dövrü ilə müqayisədə 22,2% artaraq 614,2 milyon manata yüksəlib.

Buna baxmayaraq, vaxtı keçmiş kreditlərin xüsusi çəkisi ümumi kredit portfelinin 1,9%-ni təşkil edib.

Gülnar Nazimqızı