Nazir- müsahibədə dediyim fikirlər konteksdən çıxarılıb

 Ölkədə ali təhsilin aşağı maliyyələşdirilməsi uzunmüddətli perspektivdə təhsilin keyfiyyətinə mənfi təsir göstərir və bu məsələnin ictimai müzakirəsi vacibdir. Bunu elm və təhsil naziri Emin Əmrullayev bildirib.

Nazir sosial şəbəkədə yaydığı açıqlamada qeyd edib ki, son müsahibəsində ali təhsilin maliyyələşdirilməsi ilə bağlı səsləndirdiyi fikirlər kontekstdən çıxarılaraq təqdim olunub.

Əmrullayev bildirib ki, Azərbaycanda bir tələbəyə düşən təhsil xərcləri inkişaf etmiş ölkələrlə müqayisədə aşağıdır və bu vəziyyət müəllimlərin əməkhaqları, maddi-texniki baza, elmi tədqiqatlar və digər vacib sahələrə təsir göstərir.

"Ali təhsil də digər sahələr kimi investisiya tələb edir və maliyyələşmə təhsilin keyfiyyətinə təsir edən əsas amillərdən biridir", - nazir deyib.

Nazirin sözlərinə görə, Avropa ölkələrində tez-tez "pulsuz təhsil" nümunəsi kimi göstərilən Almaniya, Fransa və Avstriyada ali təhsilin faktiki xərcləri dövlət tərəfindən qarşılanır, tələbələrin ödədiyi vəsait isə əsasən qeydiyyat haqlarıdır.

Əmrullayev qeyd edib ki, Azərbaycanda hər il bakalavr pilləsinə qəbul olunan tələbələrin yarıdan çoxu dövlət sifarişi əsasında təhsil alır və bəzi ixtisaslar tam şəkildə dövlət tərəfindən maliyyələşdirilir.
Nazir bildirib ki, ölkədə ali təhsilə yüksək tələbat səbəbindən ödənişli təhsil də mövcuddur və bir çox abituriyent dövlət hesabına digər ixtisaslarda təhsil almaq imkanına malik olsa da, seçdikləri ixtisas üzrə ödənişli təhsilə üstünlük verirlər.

Əmrullayevin sözlərinə görə, kompüter mühəndisliyi, maliyyə və inşaat mühəndisliyi kimi ixtisaslarda illik təhsil haqqının 1,500-2,000 manat səviyyəsində olması qlobal rəqabətədavamlı mütəxəssis hazırlamaq üçün kifayət etmir.

"Mənim arqumentim budur ki, bu məbləğə keyfiyyətli, qlobal rəqabətə davam gətirəcək mütəxəssis hazırlamaq mümkün deyil", - nazir bildirib.

O əlavə edib ki, məqsəd ali məktəblərdə təhsil haqlarının artırılmasını təklif etmək deyil, ali təhsilin maliyyələşdirilməsi və keyfiyyət məsələləri ətrafında konstruktiv müzakirələrin aparılmasıdır.

Nazir həmçinin bəzi hallarda keyfiyyətsiz ali təhsil diplomu əvəzinə keyfiyyətli peşə təhsilinin daha səmərəli seçim ola biləcəyini qeyd edib.

Gülnar Nazimqızı