Azərbaycan üzərindən Ermənistana tranzit buğda daşınması 35 min tonu ötüb

Rusiyadan Ermənistana göndərilən daha bir taxıl yükü tranzit olaraq Azərbaycan ərazisindən keçib.

Məlumata görə, iyulun 3-də Biləcəri dəmir yolu stansiyasından Böyük Kəsik istiqamətində yola salınan 14 vaqon 976 ton buğda daşıyıb.

Beləliklə, indiyədək Rusiyadan Ermənistana Azərbaycan ərazisi vasitəsilə tranzit daşınan taxılın həcmi 35 min tonu ötüb.

Statistikaya əsasən, bu marşrutla indiyədək Ermənistana təxminən 8 min ton mineral gübrə, 133 ton alüminium, 68 ton qarabaşaq yarması və 414 ton antrasit də daşınıb.

Eyni zamanda, Azərbaycandan Ermənistana 14 min tondan çox dizel yanacağı, həmçinin təxminən 5 min ton Aİ-92 və Aİ-95 markalı benzin ixrac edilib.

Azərbaycan son dövrdə regionda tranzit-logistika imkanlarını genişləndirərək qonşu ölkələr arasında yükdaşımalarında mühüm nəqliyyat dəhlizi kimi çıxış edir. Rusiya ilə Ermənistan arasında bir sıra yüklər dəmir yolu vasitəsilə Azərbaycan ərazisindən tranzit qaydasında daşınır.

Aytac Zeynalova