Deputat: maliyyə piramidaları vətəndaşların etimadını sarsıdıb

Azərbaycanda vətəndaşların yeni maliyyə alətlərinə qarşı ehtiyatlı yanaşması təbiidir. Bunu deputat Müşfiq Cəfərov deyib.

Onun sözlərinə görə, bunun səbəbi keçmişdə müxtəlif maliyyə piramidaları və saxta investisiya layihələri ilə bağlı yaşanan mənfi təcrübələrdir.

Müşfiq Cəfərov bildirib ki, qanunun işlək olması üçün vətəndaşlara onların vəsaitinin necə qorunacağı barədə aydın və konkret təminatlar verilməlidir.

"Biz "bu layihə innovativdir" deməklə kifayətlənməməli, vətəndaşa "sizin pulunuz necə qorunur?" sualının konkret cavabını təqdim etməliyik", - deputat vurğulayıb.

O qeyd edib ki, beynəlxalq təcrübədə Kraudfandinq -in uğurunu təmin edən əsas amil rəqəmsallıq deyil, dövlət tərəfindən yaradılan etibarlı nəzarət mexanizmləridir.

Deputat bu baxımdan Malayziya və Fransa təcrübələrini nümunə göstərib.

Onun sözlərinə görə, Malayziyada Kraudfandinq platformalarında fəaliyyət göstərən operatorların və layihə müəlliflərinin məhkəmə keçmişi, işgüzar nüfuzu, hətta sosial media reputasiyası belə maliyyə tənzimləyicisi tərəfindən yoxlanılır və hər hansı risk aşkar edilərsə, layihənin fəaliyyətinə icazə verilmir.

Fransada isə Kraudfandinq vasitəsilə vəsait toplayan şirkətlər topladıqları vəsaitin xərclənməsi barədə platformalarda mütəmadi və ətraflı hesabat təqdim edirlər ki, bu da investor etimadını artırır.

Deputat bildirib ki, Azərbaycan qanunvericiliyində də vətəndaşların maraqlarının qorunmasına xidmət edən əsas mexanizmlər nəzərdə tutulub.

Onun sözlərinə görə, bunlardan birincisi, platformaların fəaliyyətinə ciddi dövlət nəzarətidir. Belə ki, Azərbaycan Respublikasının Mərkəzi Bankı operatorları xüsusi reyestrdə qeydiyyata alacaq, onların təsisçilərinin və benefisiar sahiblərinin işgüzar nüfuzunu qiymətləndirəcək.

İkinci mühüm mexanizm xüsusi, dondurulmuş hesablar sistemidir. Deputat qeyd edib ki, vətəndaşların yatırdığı vəsait birbaşa layihə sahibinə ötürülməyəcək. Vəsait bank hesabında saxlanılacaq və layihə müəyyən edilmiş maliyyə hədəfinə çatmadıqda və ya öhdəliklər yerinə yetirilmədikdə, qanunvericiliyə uyğun olaraq investorlara geri qaytarılacaq.

Müşfiq Cəfərov əlavə edib ki, qanun layihəsində investorların emosional qərarlarının qarşısını almaq üçün əlavə təminat da nəzərdə tutulur. Belə ki, vətəndaş layihəyə investisiya etdikdən sonra müəyyən edilmiş yeddi günlük müddət ərzində heç bir cərimə ödəmədən qərarını dəyişə və vəsaitini geri ala biləcək.

Deputatın sözlərinə görə, əsas məqsəd yalnız yeni qanun qəbul etmək deyil, Azərbaycanda rəqəmsal investor mədəniyyətinin formalaşdırılmasıdır.

"Vətəndaş əmin olmalıdır ki, onun sərbəst vəsaiti dövlət tərəfindən tənzimlənən hüquqi mexanizmlər çərçivəsində ölkənin real sektoruna, kənd təsərrüfatına və innovativ layihələrə yönəldilə bilər. Bu, həm investora, həm də ölkə iqtisadiyyatına fayda verəcək", - Müşfiq Cəfərov bildirib.

O vurğulayıb ki, qanun layihəsi Azərbaycanda şəffaf, tənzimlənən və risklərin minimuma endirildiyi yeni maliyyə ekosisteminin formalaşması üçün hüquqi baza yaradacaq.

Gülnar Nazimqızı