Ukraynada dron hücumuna məruz qalan gəmidən xilas edilən 10 azərbaycanlı ölkəyə yola salınıb

Odessa şəhəri yaxınlığında dron hücumuna məruz qalan "Atlas Bey" mülki ticarət gəmisindən xilas edilən 10 Azərbaycan vətəndaşı iyulun 15-də Ukraynadan Azərbaycana yola salınıb. 

"Report"un məlumatına görə, Azərbaycanın Ukraynadakı səfirliyinin diplomatları Fərid Babayev və Pərviz Əsədovun müşayiəti ilə Gülana Lətifova, Tofiq Nəsrullayev, Səbuhi Səmədov, İsmayıl İsmayılov, Aydın Əliyev, Cavid Rəhimov, Mehman Rəhimov, İsmayıl Axundov, Qurban Əliyev və Valeh Abasov Moldova üzərindən Azərbaycana yola salınıblar.

Azərbaycan Xarici İşlər Nazirliyinin məlumatına görə, iyulun 14-də yerli vaxtla saat 15:15 radələrində Türkiyənin "Okean Maritime" şirkətinə məxsus "Atlas Bey" mülki ticarət gəmisi Ukraynanın Odessa sahilləri yaxınlığında dron hücumuna məruz qalıb. 

Gəmidə ekipajın 11 üzvü Azərbaycan vətəndaşı olub. Azərbaycan vətəndaşı olan gəmi kapitanı istisna olmaqla, digər ekipaj üzvləri sahilə çıxarılıb. Kapitanın axtarışları davam edir.