Azərbaycan xarici sularda çalışan dənizçiləri müharibə zonalarından uzaq durmağa çağırıb

Dövlət Dəniz və Liman Agentliyi xarici sularda müxtəlif dövlətlərin bayraqları altında üzən gəmilərdə çalışan azərbaycanlı dənizçilərə təhlükəsizlik riskləri yüksək olan bölgələrə səfərlərdən çəkinmələri ilə bağlı çağırış edib. 

Qurumun məlumatında bildirilir ki, son aylarda xarici sularda çalışan azərbaycanlı dənizçilərin həlak olması ilə bağlı xəbərlər narahatlıq doğurur.

Agentlik xüsusilə Qara və Azov dənizləri hövzəsində, eləcə də Hörmüz boğazı və Fars körfəzində təhlükəsizlik risklərinin yüksək olduğunu vurğulayaraq dənizçiləri həyat və sağlamlıqlarını prioritet hesab etməyə çağırıb.

Qurum dənizçilərə müharibə zonalarına və ya aktiv hərbi əməliyyatların aparıldığı ərazilərə səfərlərə razılıq verməzdən əvvəl mövcud riskləri diqqətlə qiymətləndirməyi, rəsmi qurumların təhlükəsizlik xəbərdarlıqlarını nəzərə almağı və mümkün olduğu hallarda bu cür marşrutlardan imtina etməyi tövsiyə edib.

Agentlik eyni zamanda gəmiçilik şirkətlərini və aidiyyəti qurumları dənizçilərin təhlükəsizliyini prioritet saymağa, onları yüksək riskli bölgələrə göndərərkən bütün zəruri təhlükəsizlik tədbirlərini görməyə və imkan daxilində belə marşrutlardan istifadə etməməyə çağırıb.