Qarabağ Universiteti ixtisaslar üzrə minimum keçid ballarını açıqlayıb

Qarabağ Universiteti 2026/2027-ci tədris ili üzrə bakalavriat səviyyəsinə qəbul aparılacaq ixtisaslar üçün minimum bal tələblərini müəyyən edib. Bu barədə Elm və Təhsil Nazirliyi məlumat yayıb.

Nazirliyin məlumatına görə, universitetdə ən aşağı keçid balı 250 bal olmaqla "Turizm işinin təşkili" ixtisası üzrə müəyyən edilib. Ən yüksək minimum bal tələbi isə 600 bal olmaqla "Tibb" ixtisasına tətbiq olunacaq.

Nazirlik digər ixtisaslar üzrə minimum keçid ballarının da müəyyənləşdirildiyini bildirib.

Qarabağ Universiteti Xankəndi şəhərində ilk dəfə 1969-cu ildə fəaliyyətə başlayıb. Prezident İlham Əliyevin 28 noyabr 2023-cü il tarixli fərmanı ilə universitet yenidən təsis edilib və 2024-cü ildən fəaliyyətini bərpa edib.

Hazırda universitetdə 27 ixtisas üzrə 2 500-ə yaxın tələbə təhsil alır. İnkişaf planına əsasən, universitetdə 34 ixtisas və 6 istiqamət üzrə, o cümlədən 100 tələbəlik tibb ixtisası daxil olmaqla, ümumilikdə 4 minədək tələbənin təhsil alması və yataqxanalarla təmin edilməsi nəzərdə tutulur.

2026-cı ildə Qarabağ Universitetinin fəaliyyətinin maliyyələşdirilməsi üçün dövlət büdcəsindən 39 milyon manat vəsait ayrılması planlaşdırılır. Bu vəsait "Azərbaycan Respublikasının 2026-cı il dövlət büdcəsi haqqında" qanun layihəsində əksini tapıb. Bu maliyyələşmənin universitetin infrastrukturunun inkişafına, tədris imkanlarının genişləndirilməsinə və Xankəndidə ali təhsil sisteminin gücləndirilməsinə xidmət edəcəyi gözlənilir.

Gülnar Nazimqızı