Rusiya Ermənistandan gətirilən bəzi su və içkilərin satışını dayandırıb

Rusiya Ermənistandan idxal edilən bəzi mineral sular və alkoqolsuz içkilərin satışını müvəqqəti dayandırıb. Bu barədə "Kommersant" qəzeti məlumat yayıb.

Məlumata görə, qərar Rospotrebnadzorun müəyyən məhsul partiyalarının məcburi təhlükəsizlik tələblərinə cavab vermədiyi barədə qərarından sonra qəbul edilib. Məhdudiyyət 70 mindən çox şüşə məhsulu əhatə edir.

İstehlakçı Hüquqlarının Müdafiəsi və İnsan Rifahının İnkişafı Mərkəzinin (İRİM) baş direktorunun müavini Revaz Yusupov bildirib ki, Rospotrebnadzorun göstərdiyi partiyaların satışı bütün zəruri yoxlamalar başa çatana qədər pərakəndə satış və onlayn ticarət şəbəkələrində qadağan edilib.

Onun sözlərinə görə, ölkədə tətbiq olunan etiketləmə sistemi bütün kassa aparatları ilə inteqrasiya olunduğundan, qadağa dərhal tətbiq edilir.

Məhdudiyyətlər "Bjni" mineral müalicəvi süfrə suyu, "Prosto Azbuka" təbii içməli suyu və DARBAS Mojito alkoqolsuz içkisinin yalnız müəyyən tarixlərdə istehsal edilmiş partiyalarına şamil olunur. Qadağa həmin markaların bütün məhsullarını əhatə etmir.

Rusiya son aylarda Ermənistandan idxal olunan bir sıra məhsullara məhdudiyyətlər tətbiq edib. May ayının sonundan etibarən spirtli içkilər, meyvə-tərəvəz, güllər və digər məhsulların bəzi partiyalarının idxalı və dövriyyəsi təhlükəsizlik tələblərinə uyğunluğun yoxlanılması məqsədilə məhdudlaşdırılıb. Rusiya tərəfi bu tədbirlərin müvəqqəti xarakter daşıdığını və istehlakçıların sağlamlığının qorunmasına yönəldiyini bildirir. Rusiyanın sanitariya qaydalarına əsasən, ölkəyə idxal edilən içməli sular epidemioloji və radiasiya baxımından təhlükəsiz, kimyəvi cəhətdən zərərsiz olmalı və müəyyən edilmiş keyfiyyət standartlarına cavab verməlidir.

Gülnar Nazimqızı