Azərbaycanda 7 ayda 6,2 tondan çox narkotik dövriyyədən çıxarılıb

Azərbaycanın hüquq-mühafizə orqanları 2026-cı ilin yanvar-iyulunda narkotik vasitələrin qanunsuz dövriyyəsi ilə bağlı 4 963 cinayət faktı aşkarlayıb.

Dövlət Komissiyasının İşçi Qrupunun məlumatına görə, həmin faktlardan 1 250-si narkotik vasitələrin qanunsuz satışı, 3 613-ü narkotik vasitələrin satış məqsədi olmadan qanunsuz əldə edilib saxlanılması, 97-si narkotik tərkibli bitkilərin qanunsuz əkilib-becərilməsi, üçü isə digər cinayətlərlə bağlı olub.

Aşkarlanmış faktlar üzrə qanunsuz dövriyyədən ümumilikdə 6 ton 223 kq 519 qram narkotik vasitə və psixotrop maddə müsadirə edilib. Müsadirə olunan narkotiklərin ümumi dəyəri 187,2 milyon manat qiymətləndirilib.

Müsadirə edilən maddələrin əsas hissəsini 5 ton 307 kq marixuana təşkil edib. Onun 4 ton 422 kq-ı xarici ölkə mənşəli, 885 kq-dan çoxu isə Azərbaycanda qanunsuz kultivasiya edilmiş marixuana olub.

2025-ci ilin yanvar-iyul ayları ilə müqayisədə bu ilin eyni dövründə aşkarlanan narkotik cinayətlərinin ümumi sayı 251 fakt azalıb. Bununla belə, qanunsuz dövriyyədən çıxarılan narkotiklərin çəkisi 1 ton 274 kq artıb.

Gülnar Nazimqızı