Müdafiə Nazirliyinin sabiq rəisi Rasim Həsənova 15 min manat cərimə verilib

Müdafiə Nazirliyinin Mərkəzi Hərbi Həkim Komissiyasının sabiq rəisi Rasim Həsənovun cinayət işi üzrə məhkəmə prosesi yekunlaşıb və ona 15 min manat cərimə cəzası verilib. Bu barədə APA məlumat yayıb.

Hökm Bakı Hərbi Məhkəməsində elan olunub.

Hakim Anar Rzayevin sədrliyi ilə keçirilən prosesdə Həsənova verilmiş ittihamların hüquqi tövsifi dəyişdirilib və əməli Cinayət Məcəlləsinin 178.3.2-ci maddəsi (külli miqdarda ziyan vurmaqla dələduzluq) ilə tövsif olunub.

Məhkəmənin hökmü ilə Rasim Həsənov 15 min manat cərimələnib və məhkəmə zalından azadlığa buraxılıb.

İbtidai istintaqın məlumatına görə, Həsənov 2021-2025-ci illərdə vəzifədə işləyərkən hərbi qulluqçuların şəhadətləndirilərək tərxis olunmalarına kömək göstərmək müqabilində ayrı-ayrı şəxslərdən müxtəlif məbləğlərdə pul vəsaitini rüşvət kimi təkrarən almaqda və vəzifə saxtakarlığında şübhəli bilinib.

İstintaq zamanı ona Cinayət Məcəlləsinin 311.3.2, 311.3.3 (təkrarən və külli miqdarda rüşvət alma), 313 (vəzifə saxtakarlığı) və 341.2.3-cü (ağır nəticələrə səbəb olan vəzifə səlahiyyətlərindən sui-istifadə) maddələri ilə ittiham elan olunub və məhkəmənin qərarı ilə barəsində həbs qətimkan tədbiri seçilib.