Rüfət Səfərovun 8 illik həbs cəzası qüvvədə saxlanılıb

Bakı Apellyasiya Məhkəməsi hüquq müdafiəçisi Rüfət Səfərovun barəsində çıxarılmış hökmə dair apellyasiya şikayətini təmin etməyib.

Hakim Habil Məmmədovun sədrliyi ilə keçirilən iclasda Bakı Ağır Cinayətlər Məhkəməsinin hökmünün dəyişdirilmədən saxlanılmasına qərar verilib.

Bakı Ağır Cinayətlər Məhkəməsinin hökmü ilə Səfərov 8 il müddətinə azadlıqdan məhrum edilib.

Rüfət Səfərov 2024-cü il dekabrın 3-də saxlanılıb. İttihama görə, o, Novxanıda bağ sahəsinin satılması vədi ilə zərərçəkmiş Natiq İmaquliyevdən 60 min manatdan çox pul alıb, lakin vədinə əməl etməyib.

İttiham materiallarına əsasən, bundan sonra İmaquliyev Səfərovun qarajına gedərək onunla mübahisə edib və hadisə zamanı xəsarət alıb.

Səfərova Cinayət Məcəlləsinin 221.1-ci (xuliqanlıq), 127.2.3-cü (qəsdən sağlamlığa az ağır zərər vurma) və 178.3.2-ci (külli miqdarda ziyan vurmaqla dələduzluq) maddələri ilə ittiham irəli sürülüb.

Tatyana