Dövlət Statistika Komitəsinə yeni aparat rəhbəri təyin olunub

Azərbaycan Dövlət Statistika Komitəsinin Aparat rəhbəri vəzifəsinə Səbuhi Əliyev təyin edilib. Bu barədə unikal məlumat yayıb. 

Əliyev bu vəzifəyə qədər Dövlət Statistika Komitəsi sədrinin müşaviri kimi fəaliyyət göstərib. O, 24 avqust 2026-cı ildə Aparat rəhbəri vəzifəsinə təyin olunub.

43 yaşlı Səbuhi Əliyev 2004-cü ildə Azərbaycan Dövlət İqtisad Universitetində beynəlxalq iqtisadi münasibətlər ixtisası üzrə bakalavr, 2009-cu ildə isə magistr təhsili alıb.

O, 2007-2010-cu illərdə Dövlət Əmlakının İdarə Edilməsi üzrə Dövlət Komitəsində, 2010-2019-cu illərdə Maliyyə Nazirliyi yanında Dövlət Borcunun İdarə Edilməsi Agentliyində müxtəlif vəzifələrdə çalışıb. 2019-cu ildə Vergilər Nazirliyində fəaliyyət göstərib.

Əliyev 2019-2024-cü illərdə Maliyyə Nazirliyi yanında Dövlət Borcunun və Maliyyə Öhdəliklərinin İdarə Edilməsi Agentliyində, o cümlədən şöbə müdiri vəzifəsində işləyib. 2024-cü il avqustun 19-dan 2026-cı il aprelin 13-dək həmin agentliyin direktor müavini olub.

2026-cı il aprelin 14-dən avqustun 24-dək Dövlət Statistika Komitəsi sədrinin müşaviri vəzifəsində çalışan Əliyev bundan sonra komitənin Aparatına rəhbərlik edəcək.

O, 2025-ci il iyunun 21-də Prezident İlham Əliyevin sərəncamı ilə “Dövlət qulluğunda fərqlənməyə görə” medalı ilə təltif edilib.