Yardımlı İcra Hakimiyyətində əməliyyat: həbs olunanlar var

Yardımlı Rayon İcra Hakimiyyətinin başçısı Ayaz Əsgərovun vəzifəsindən azad edilməsinin səbəbi ilə bağlı yeni məlumatlar yayılıb.

Ölkə.az-ın məlumatına görə, hüquq-mühafizə orqanları bir müddət əvvəl Yardımlı rayonunda antikorrupsiya əməliyyatı keçirib.

Əməliyyat zamanı Rayon İcra Hakimiyyətinin Sosial-iqtisadi inkişafın təhlili və proqnozlaşdırılması şöbəsinin müdir müavini Elçin Adil oğlu Mirzəyev və baş məsləhətçi Yaşar Həsənağa oğlu Eyvazov saxlanılıb.

Məlumata görə, onlar qanunsuz torpaq satışı ilə bağlı şübhəli bilinirlər. Hər iki şəxs barəsində vəzifə səlahiyyətlərindən sui-istifadə və korrupsiya ittihamları irəli sürülüb.

Hazırda cinayət işi Baş prokuror yanında Korrupsiyaya qarşı Mübarizə Baş İdarəsində araşdırılır.

Baş Prokurorluğun Mətbuat xidməti faktı təsdiqləyib.

İstintaq davam edir.