Cəlal Qasımov: “Executive MBA” proqramının nəticəsi daha keyfiyyətli qərarlar olmalıdır

“Executive MBA” proqramının əsas nəticəsi iştirakçıların yeni biliklər əldə etməsi ilə yanaşı, onların düşüncə və qərarvermə yanaşmalarının dəyişməsi olmalıdır. Bunu “PAŞA Holdinq”in baş icraçı direktoru Cəlal Qasımov ADA Universitetində Liderlik və İnnovasiya üzrə IE Mərkəzinin “AZEMBA” proqramının açılışında deyib.

Onun sözlərinə görə, güclü “Executive MBA” proqramı iştirakçıların təfəkkür tərzini, insanları və təşkilatları anlama baxışını, eləcə də natamam məlumat və kompromislər şəraitində qərarvermə keyfiyyətini təkmilləşdirməlidir.

Qasımov bildirib ki, iştirakçılar artıq öz təcrübə, karyera və dünyagörüşlərini formalaşdırıblar və proqram çərçivəsində yeni bilik, beynəlxalq təcrübə və digər iştirakçıların təcrübəsi ilə əlavə kapital əldə edirlər.

“Bu kapitalın dəyəri yatırılan investisiyanın həcmindən deyil, onun daha yaxşı qərarlara, daha geniş perspektivə və başqalarının inkişafına necə çevrilməsindən asılıdır”, - deyə o bildirib.

O qeyd edib ki, belə bir transformasiya ciddi vaxt və enerji tələb edir. Bunun nəticəsi isə yalnız proqramın sonunda əldə ediləcək diplomda deyil, iştirakçıların lider kimi inkişafında və yaratdıqları dəyərdə özünü göstərməlidir.