“IE University” Azərbaycanla uzunmüddətli əməkdaşlığı inkişaf etdirmək istəyir

“IE University” Azərbaycanla təhsil, bilik və tərəfdaşlığa əsaslanan uzunmüddətli əməkdaşlığın inkişafında maraqlıdır.

Bunu “IE University”nin Korporativ Əlaqələr üzrə İcraçı sədri Villiam Davila ADA Universitetində Liderlik və İnnovasiya üzrə IE Mərkəzinin “AZEMBA” proqramının açılışında deyib.

O bildirib ki, “AZEMBA” proqramının başlaması universitetlə Azərbaycan arasında uzunmüddətli əməkdaşlığın əsasını qoyur.

“Bu, “IE” ilə Azərbaycan, qlobal biliklə yerli bilik, akademiya ilə biznes və ən əsası, insanlar arasındakı tərəfdaşlığın başlanğıcıdır”, - deyə V.Davila bildirib.

Onun sözlərinə görə, universitet Azərbaycanı “IE”nin qlobal şəbəkəsi ilə daha sıx əlaqələndirməyi, yerli təşkilatların prioritet və çağırışlarını öyrənməyi, istedadların inkişafına və bilik mübadiləsinə töhfə verməyi hədəfləyir.

Davila qeyd edib ki, süni intellekt, texnoloji və geosiyasi dəyişikliklər fonunda liderlər üçün düzgün suallar vermək, müxtəlif perspektivləri birləşdirmək və qeyri-müəyyənlik şəraitində qərar qəbul etmək bacarıqları daha vacib olur.

O, “PAŞA Holding”, SOCAR və digər tərəfdaşlarla əməkdaşlığın əhəmiyyətini vurğulayıb və “IE University”nin yalnız Azərbaycana bilik gətirməyəcəyini, eyni zamanda ölkənin təcrübəsindən öyrənəcəyini bildirib.

“Biz buraya sadəcə dərs deməyə gəlməmişik, biz də öyrənməyə gəlmişik”, - deyə V.Davila əlavə edib.

Aytac