Azərbaycan və Banqladeş arasında viza rejimi sadələşdirilir

Azərbaycanın xarici işlər naziri Ceyhun Bayramov və Banqladeşin xarici işlər naziri Xəlilur Rəhman Nyu-Yorkda diplomatik, rəsmi və xidməti pasport sahibləri üçün viza tələbindən azad edilməsinə dair saziş imzalayıblar.Bu barədə Azərbaycan Xarici İşlər Nazirliyi "X" sosial şəbəkəsində məlumat yayıb.

Sənəd BMT Baş Assambleyasının 81-ci sessiyası çərçivəsində imzalanıb.

Nazirliyin məlumatına görə, saziş rəsmi təmasların gücləndirilməsinə və Azərbaycan-Banqladeş tərəfdaşlığının genişləndirilməsinə xidmət edəcək.

İmzalanma mərasimindən sonra nazirlər iki ölkə arasında münasibətlərin hazırkı vəziyyətini və inkişaf perspektivlərini müzakirə ediblər.

Görüşdə siyasi dialoqun gücləndirilməsi, ticarət və iqtisadi əməkdaşlığın genişləndirilməsi, həmçinin təhsil və humanitar sahələrdə əlaqələrin inkişafı məsələləri müzakirə olunub.