TƏBİB sistemdəki problemlə bağlı açıqlama verib

 TƏBİB-in tabeliyində olan tibb müəssisələrində istifadə edilən informasiya sistemlərinin fəaliyyətində şəbəkə və kibertəhlükəsizlik həlləri ilə bağlı müvəqqəti fasilələr yaranıb. Bu barədə TƏBİB Anews.az-ın sorğusuna cavab olaraq bildirib.

Qurum qeyd edib ki, sistemlərdə yaranan fasilə səbəbindən vətəndaşların qeydiyyatı alternativ qaydada həyata keçirilir və tibbi xidmətlərin davamlılığının təmin olunması diqqətdə saxlanılır.

“Fasilələrin səbəbi şəbəkə və kibertəhlükəsizlik həlləri ilə əlaqəlidir. İnformasiya sistemlərinin fəaliyyətində fasilə yarandığı müddətdə vətəndaşlara göstərilən tibbi xidmətlərin davamlılığının təmini məqsədilə qeydiyyat prosesi alternativ qaydada həyata keçirilir”, - TƏBİB bildirib.

Qeyd olunub ki, texniki problemin aradan qaldırılması üçün aidiyyəti istehsalçı şirkətin yerli və beynəlxalq mütəxəssisləri tərəfindən zəruri tədbirlər görülür.

“Hazırda texniki problemin aradan qaldırılması istiqamətində aidiyyəti istehsalçı şirkətin yerli və beynəlxalq mütəxəssisləri tərəfindən zəruri tədbirlər görülür. Vətəndaşlara göstərilən tibbi xidmətlərin fasiləsizliyinin təmin olunması diqqətdə saxlanılır. Yaranmış müvəqqəti narahatlığa görə vətəndaşlardan üzr istəyirik”, - açıqlamada deyilir.

Sosial şəbəkələrdə Elmi-Tədqiqat Travmatologiya və Ortopediya İnstitutunda sistemin iki gündür işləmədiyi və vətəndaşların saatlarla növbədə gözlədiyi barədə məlumatlar yayılmışdı.