AGMA məktəblərdə vahid geyim qaydalarına riayət etməyə çağırıb

Azərbaycan Gənc Müəllimlər Assosiasiyası (AGMA) məktəblərdə vahid geyim qaydalarına riayət edilməsinin vacibliyini vurğulayıb. Bu barədə assosiasiyanın bəyanatında bildirilib.

AGMA hesab edir ki, məktəblərdə geyim qaydaları nizam-intizamın qorunmasına, vahid yanaşmanın təmin edilməsinə və şagirdlər üçün bərabərhüquqlu təhsil mühitinin yaradılmasına xidmət edir.

Bəyanatda qeyd olunub ki, qaydaların uğurlu tətbiqi məktəb rəhbərliyinin, müəllimlərin, valideynlərin və şagirdlərin qarşılıqlı əməkdaşlığını tələb edir. Qaydaların mahiyyəti və tətbiq mexanizmi aydın izah edilməli, yaranan suallar qarşılıqlı hörmət və açıq dialoq əsasında müzakirə olunmalıdır.

Assosiasiya məktəb rəhbərlərini və müəllimləri geyim qaydalarının izahı və tətbiqi zamanı peşəkar, vahid və həssas yanaşma nümayiş etdirməyə, şagirdlərin hüquq və ləyaqətinin qorunmasını əsas tutmağa çağırıb.

Valideynlərə isə narahatlıqlarını konstruktiv dialoq çərçivəsində ifadə etmək və məsələyə qüvvədə olan normativ hüquqi aktların tələbləri əsasında yanaşmaq tövsiyə olunub.

Bəyanatda müəllimlərin geyiminin və peşəkar davranışının məktəbdə formalaşan ümumi mühitin bir hissəsi olduğu da vurğulanıb.

“AGMA bir daha bəyan edir ki, məktəblərdə müəyyən edilmiş geyim qaydalarına riayət olunması vacibdir. Bu prosesdə bütün tərəflərin məsuliyyətli davranışı, qarşılıqlı hörmət və əməkdaşlıq əsas şərtlərdir”, - bəyanatda qeyd olunub.