İSESKO süni intellekt sahəsində iki il ərzində 10 min liderə təlim keçməyi hədəfləyir

İslam Dünyası Təhsil, Elm və Mədəniyyət Təşkilatı (İSESKO) Beynəlxalq Süni İntellekt Tədqiqatları və Etika Mərkəzi ilə əməkdaşlıq çərçivəsində iki il ərzində 10 min liderə təlim keçməyi hədəfləyir. Bunu İSESKO-nun baş direktoru Salim əl-Malik Bakı forumunda çıxışı zamanı bildirib.

Təşkilat, həmçinin İslam dünyası üçün Süni İntellekt İndeksi vasitəsilə ölkələrin bu sahədə hazırlıq səviyyəsini qiymətləndirməyə çalışır.

Onun sözlərinə görə, çoxtərəfli əməkdaşlığa etimadın bərpası beynəlxalq öhdəliklərlə onların icrası arasındakı fərqin aradan qaldırılmasını, prinsiplərin tətbiqində ədalətin və verilən vədlərin yerinə yetirilməsində ardıcıllığın təmin olunmasını tələb edir.

Əl-Malik qeyd edib ki, beynəlxalq institutların etibarlılığı ölkələrin etibarlı dəstək alması və icmaların real irəliləyiş görməsi ilə möhkəmlənir. O, institusional koordinasiyanın gücləndirilməsinin və milli səylərin uzlaşdırılmasının vacibliyini vurğulayıb.

Onun fikrincə, milli administrasiyaların üst-üstə düşən təşəbbüslərə və ayrı-ayrı hesabat tələblərinə sərf etdiyi vaxtın azaldılması resursların milli prioritetlərə yönəldilməsinə imkan verə bilər.

İSESKO-nun baş direktoru sülhün qorunması üçün qabaqlayıcı tədbirlərin iqtisadi əhəmiyyətinə də toxunub. O bildirib ki, proaktiv sülh quruculuğuna qlobal hərbi xərclərin təxminən 0,5%-i ayrılır.

Əl-Malik BMT və Dünya Bankının 2018-ci ildə yayımladığı “Sülh üçün yollar” tədqiqatına istinad edərək, güclü profilaktik tədbirlərin ildə 5 milyard dollardan 70 milyard dollaradək qənaət təmin edə biləcəyini qeyd edib. O vurğulayıb ki, erkən müdaxilə insan həyatını qorumaqla yanaşı, inkişaf üçün zəmin yaradır.

Təşkilat rəhbəri təhsil və mədəniyyətin sülh quruculuğundakı rolunu da önə çəkib. Onun sözlərinə görə, təhsil gənclərin cəmiyyətdə fəal iştirakına imkan yaradır, mədəniyyətlə təmas isə qarşılıqlı anlaşmanı və icmaların kimliyinə hörməti gücləndirir.

Əl-Malik süni intellektin nəsli kəsilmək təhlükəsi ilə üzləşən dillərin qorunmasına və mədəni irsə çıxışın genişləndirilməsinə kömək edə biləcəyini bildirib. Bununla yanaşı, o, texnologiyanın tətbiqi zamanı qərəz və dezinformasiyaya qarşı təminatların vacibliyini vurğulayıb.

O qeyd edib ki, 2025-ci ilin dekabrında Bakıda Heydər Əliyev Fondu və Azərbaycan Elm və Təhsil Nazirliyi ilə birgə İslam dünyası üçün Süni İntellekt İndeksi təşəbbüsü başladılıb.

Gülnar Nazimqızı