Akif Quliyev: Kür çayında suyun səviyyəsinin enməsi hazırda gözlənilmir

Kür çayında suyun səviyyəsinin enməsi hazırda gözlənilmir. Bunu Azərbaycan Dövlət Su Ehtiyatları Agentliyinin rəsmisi Akif Quliyev bildirib.

Onun sözlərinə görə, son illərdə Kür çayında suyun səviyyəsinin ümumi azalması müşahidə olunmur. Mingəçevir su anbarında da kifayət qədər su ehtiyatı toplanıb.

Quliyev qeyd edib ki, su anbarlarının doldurulması və boşaldılması, eləcə də Kür çayına suyun buraxılması prosesi gündəlik nəzarətdə saxlanılır. Bu istiqamətdə aparılan işlər barədə mütəmadi hesabatlar hazırlanaraq aidiyyəti üzrə təqdim edilir.

Agentlik rəsmisi vurğulayıb ki, görülən işlərə Prezidentin yaratdığı Su Komissiyası tərəfindən xüsusi nəzarət həyata keçirilir.

O əlavə edib ki, əvvəlki illərdə Kür çayında suyun səviyyəsinin azalmasının səbəblərindən biri ekoloji tarazlığın pozulması, digəri isə yağıntıların az olmasıdır.

Aytac Zeynalova