Zaur Əliyev: Peşə təhsili aqrar sektorda yeni sahibkarların formalaşmasına imkan yarada bilər

Peşə təhsilinin real sektorun ehtiyaclarına uyğun qurulması aqrar sahədə yeni sahibkarların formalaşmasına və regionlarda məşğulluğun artırılmasına töhfə verə bilər. Bunu kənd təsərrüfatı nazirinin müavini Zaur Əliyev “Peşə Təhsili Forumu 2026”da çıxışı zamanı deyib.
Onun sözlərinə görə, aqrar sektorda çalışan əhalinin böyük hissəsi regionlarda məskunlaşıb. Buna görə də kənd təsərrüfatına yalnız iqtisadi gəlir və məşğulluq mənbəyi kimi deyil, həm də regionların inkişafı və kənd yerlərində əhalinin məskunlaşmasının qorunması baxımından yanaşılmalıdır.
Nazir müavini bildirib ki, peşə təhsili müəssisələrinin maddi-texniki bazasının yaxşılaşdırılması, tədris prosesinin real sektorun ehtiyaclarına uyğunlaşdırılması xüsusi əhəmiyyət daşıyır.
O qeyd edib ki, peşə təhsili alanların real iş mühitində formalaşması onların əmək bazarında iş tapmaq imkanlarını artırmaqla yanaşı, gələcəkdə aqrar sektorda sahibkar kimi fəaliyyət göstərmələrinə də şərait yarada bilər.
“Əgər təhsil prosesi real sektora nə qədər yaxın qurularsa, gələcəkdə məzunlarımız aqrar sahədə sahibkar olmaqla məşğulluq da yarada bilərlər. Bu, kənd yerlərində əhalinin qalması, məşğulluğun təmin edilməsi və gəlirlərin formalaşması baxımından mühüm əhəmiyyət daşıyır”, – o bildirib.

























