İlqar Bayramlı: Yeni peşə ixtisaslarına maraq digər ixtisaslarla müqayisədə iki dəfə yüksəkdir

Azərbaycanda son 4 ildə peşə təhsili üzrə 33 yeni ixtisas yaradılıb. Bu ixtisaslar üzrə builki qəbul zamanı hər 10 yerə 113 müraciət daxil olub.
Bunu Peşə Təhsili üzrə Dövlət Agentliyinin direktoru İlqar Bayramlı “Peşə Təhsili Forumu 2026”da çıxışı zamanı deyib.
Onun sözlərinə görə, digər ixtisaslar üzrə hər 10 yerə müraciət sayı 58 olub. Beləliklə, yeni ixtisaslara maraq ümumi göstərici ilə müqayisədə təxminən iki dəfə yüksəkdir.
Agentlik direktoru bildirib ki, hazırda peşə təhsili müəssisələrində 150 ixtisas üzrə qəbul həyata keçirilir. Yeni ixtisaslar əmək bazarının və iqtisadiyyatın müasir tələblərinə uyğun sahələri əhatə edir.
Bayramlı qeyd edib ki, son 5 ildə 75 təhsil proqramı hazırlanıb və yenilənib, 100-dən çox dərslik tələbələrin istifadəsinə verilib. Bu dərsliklərin təxminən 200 min nüsxəsi çap olunub.
O bildirib ki, bəzi proqramlar üzrə tələbələr peşə təhsili diplomu ilə yanaşı, beynəlxalq sertifikat əldə etmək imkanı da qazanırlar. Bu istiqamətdə “Pearson”, “HCA”, “City & Guilds” kimi beynəlxalq qurumların sertifikatları təqdim olunur.
Agentlik direktoru yüksək texniki peşə təhsilinin peşə təhsili ilə ali təhsil arasında körpü rolunu oynadığını vurğulayıb. Onun sözlərinə görə, bu təhsil pilləsində məzunlara subbakalavr peşə ixtisas dərəcəsi verilir, kredit əsaslı tədris sistemi tətbiq olunur və məzunlar ali təhsil müəssisələrinə keçid imkanı əldə edirlər.
Bayramlı əlavə edib ki, cari ildə yüksək texniki peşə təhsili üzrə təhsil alan tələbələrin ümumi sayı 10 mini ötüb.

























