ANN.Az "Anadolu" Agentliyinə istinadən xəbər verir ki, bunu Türkiyə prezidenti Rəcəb Tayyib Ərdoğan deyib. Avropa Parlamentinin Avropa İttifaqını Türkiyə ilə üzvlük müzakirələrini dayandırmağa səsləyən tövsiyə xarakterli qərarına münasibət bildirən Türkiyə prezidenti Rəcəb Tayyib Ərdoğan qeyd edib ki, siz heç bir zaman insanlığa dürüst davranmadınız. İnsanlara doğru baxmadınız: 

"Ölən körpələrin cəsədləri Ağdəniz sahillərinə vuran zaman gedib oradan götürən siz olmadınız. 3,5 milyon mühaciri ölkədə yerləşdirən bizik, siz yox. Verdiyiniz sözlərə əməl etmədiniz. Kapıkuleyə 50 min mühacir gələndə, fəryad etdiniz. Sonra dediniz ki, Türkiyə sərhəd qapılarını açarsa, nə edərik? Əgər daha irəli gedilsə, sərhədlər açılar. Belə quru təhdidlərdən nə mən qorxuram, anlayıram, nə də Türk milləti”.

 

 

"14 ildə batdıqmı, çökdükmü? Ancaq inkişaf etdik. Unutmayın ki, Qərbin Türkiyəyə ehtiyacı var. Hazırda 3 milyon qaçqını yerləşdirən, bəsləyə Türkiyədir. Avropa indiyə qədər qaçqınlara yardımla bağlı bizə verdiyi vədləri yerinə yetirmədi. Türkiyə qaçqınlara öz qapılarını Avropa İttifaqından yardım gələcəyini düşünərək açmayıb. Biz o insanları bombalardan xilas olmaları üçün qəbul etdik. İndiyə qədər BMT Türkiyədə qaçqınlar üçün 550 milyon dollar,  Avropa İttifaqı 700 milyon dollara qədər vəsait göndərib. Türkiyə dövləti isə 15 milyard dollar xərcləyib.  Qeyri-hökumət təşkilatlarının xərclədiyi vəsaitləri bura daxil etmirəm”. 

 

Xatırladaq ki, noyabrın 24-də Avropa Parlamenti Avropa İttifaqını Türkiyənin quruma üzvlüyü barədə Ankara ilə aparılan müzakirə prosesini müvəqqəti dondurmağa çağıran qərar qəbul edib.