"Banklar borclu müştərilərə hədə dolu SMS-lər göndərir"

Bu barədə İqtisadi və Sosial İnkişaf Mərkəzinin rəhbəri (CESD) Vüqar Bayramov bildirib.

Onun sözlərinə görə, hədə yolu ilə borcludan ödənişi tələb etmək qanunvericiliyin tələblərinə ziddir:

"Bəzi banklar belə təzyiqlərdən istifadə etməklə borcun ödənilməsinə çalışırlar. Bankın öz borcunu istəməsinə heç kim etiraz etmir, amma bu sivil və qanunvericiliyin imkan verdiyi hallar çərçivəsində olmalıdır. Hədə metodları səmərəli olmamaqla yanaşı, eyni zamanda qanunvericiliyə ziddir”.

Eskpert, hətta təklif edib ki, bu şəkildə sizdən ödəniş tələb edən bankları müştərilər məhkəməyə verə bilər:

"Bank borclu ilə bağlı məlumatları ictimai şəkildə bölüşməklə ödənişi tələb edə bilməz. Əgər borcunuz varsa və bank sizə bu yollarla təzyiq edirsə, daha məqsədəuyğundur ki, sizi hədələyən bankı məhkəməyə verərək kompensasiya tələb edəsiniz. 

Mövcud qanunvericilik sizə belə banklardan kompensasiya tələb etmək və almaq hüququ verir. Bununla hədə yolu seçərək sizdən borc tələb edən banklardan siz pul alın. Bu həmçinin belə banklara borcu olanlardan pulu daha sivil yollar ilə istəmək vərdişi aşılaya bilər”.

V.Bayramov həmçinin qeyd edib ki, bu yaxınlarda mənə müraciət edən və bank tərəfindən ona göndərilən "hədə” SMS ilə də tanış olanda bəzi bank əməkdaşlarının "iş prinsipləri” daha aydın bəlli olub.