Bu il hansı banklar bağlanacaq?

17.01.2018 21:47

"Biz hökumətə bankların fəaliyyətinin dayandırılmasının əksinə onların konsolidasiyasına nail olmaq üçün addımlar atmağı təklif vermişik. Belə olan halda iri banklar üçün problem yaranmaz".

Bu sözləri Sonxeber.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Vahid Əhmədov Azərbaycanda daha bir neçə bank bağlanacağı və birləşdiriləcəyi ilə bağlı yayılan məlumatlara münasibət bildirərkən deyib.

Onun sözlərinə görə, Azərbaycanda bəzi banklarla əlaqədar müəyyən işlər görülür. Həmin bankların rəhbərlərinə öz kapitallaşmasını həll etmələri üçün müəyyən təlimatlar verilir ki, sonradan hər-hansı problem yaranmasın. Hazırda Azərbaycanda cəmi 30 bank fəaliyyət göstərir. Əvvəllər isə bu rəqəm 43 idi. Onların müəyyən hissəsifəaliyyətini dayandırdı, bəziləri isə birləşdirildi. Həmin bankların kapitallaşması təmin edilməlidir. Maliyyə Bazarlarına Nəzarət Palatası banklara öz aralarında danışmağı və birləşmə prosesini həyata keçirməyi təklif edir. Bununla yerli banklar yaradıla və onların kapitallaşması həyat keçirilə bilər və problemli kreditləri aradan qaldırılar. Lakin, hansı bankların bağlanacağını demək çətindir. Çünki, hökumət onların birləşdirilməsinə nail olmağa çalışır. Hazırda bu məsələnin üzərində müzakirələr aparılır.

Millət vəkili əlavə edib ki, əhalinin banklara yerləşdirdiyi əmanətləri qanunvericiliyə uyğun formada qorunur. Əvvəllər 30 min manata qədər əmanət mühafizə olunurdusa hazırda qoyulmuş məbləğin hamısı qorunur. Amma istənilən bank bağlanarkən əhali üçün problem yaranır. Onların vəsaitlərini qaytarılması prosesi zamanı narazılıqlar ortaya çıxır. Bizə bu istiqamətdə şikayətlər daxil olur. Ləğvetmə komissiyasına yaxud Maliyyə Bazarlarına Nəzarət Palatasına müraciət edərək problemin həll olunmasına çalışırıq. Buna görə də bankların bağlanmasının əleyhinəyik.

V.Əhmədov Azərbaycanda bank sistemi sahəsində problemlərin kifayət qədər çox olduğunu da vurğulayıb:

"Hazırda bank sisteminin sağlamlaşdırılması ən önəmli məsələlərdən biridir. 2018-ci ildə buna nail olmaq üçün bu sahədə olan problemlərin - kapital adekvatlığı, likvidliyi, kredit problemləri ilə bağlı qüsurlar öz həllini tapmalıdır. Bu istiqamətdə Azərbaycan hökuməti öz üzərinə düşən missiyanı yerinə yetirir. Əhali, sahibkar daha çox bankla işləməlidir. Bankdan lazım olanda faizlə kredit götürməlidir. Biz buna nail olmadığımız üçün bu ciddi məsələ olaraq qalır". - deyə, millət vəkili bildirib.

Qeyd edək ki, "Moody's" beynəlxalq reytinq agentliyi Azərbaycanda bank sektorunun konsolidasiyası 2018-ci ildə də davam edəcəyini açıqlayıb.
Agentliyin mütəxəssisləri qeyd edir ki, problemli banklarla bağlı əsas məsələ kapital çatışmazlığıdır. Manatın devalvasiyasından sonra problemli bankların aktivlərinin keyfiyyəti pisləşib. Hal-hazırda bağlanmaq təhlükəsi ilə üzləşən banklar səhmdarlar və daha güclü bazar iştirakçıları tərəfindən kapital inyeksiyası həyata keçirilməsinə baxmayaraq minimum kapital adekvatlığı əmsalına cavab verməyən banklardır. Buna görə də sektorun zəif oyunçuları 2018-ci ildə bazarı tərk edəcək.

www.anews.az

Xəbəri bəyəndiniz?

Sosial şəbəkələrdə paylaş