Azərbaycanda Avropada olan şəffaflıq yoxdur - DEPUTAT

 

Anews.az xəbər verir ki, bu sözləri deputat Razi Nurullayev Milli Məclisinin büdcə layihəsinin müzakirəsi zamanı deyib.

 

"Ölkəmizin iş adamları üçün nə qədər əlverişli olduğunu desək də, bunun belə olmadığını çox gözəl bilirik. Həm vergi, həm gömrük yükü çox ağırdır. Deyilə bilər ki, Avropada vergi və gömrük yükü bizdən də çoxdur. Doğrudur. Axı, biz Avropa deyilik, bizdə Avropada olan şəffafllq, açıqlıq və aydınlıq yoxdur. Xeyli qarış-quruş,  parçalanmış, müxtəlif əllərdə və idarələrdə cəmlənmiş sistem var. Bir çox dövlət idarələri onlara aid olmayan işlərlə yüklənib və çox xoşbəxtdirlər. Hökumət, dövlət idarələri, büdcə təşkilatları iş yeri yaratmalı, sərmayə yatırmalı deyil. Bunu iş adamı etməlidir və ona da şərait yaratmaq lazımdır ki, qanun çərçivəsində ürəyi istəyən qədər pul qazansın. İş yeri yaratmağa yönəlik tənzimləmə, o şəraiti yaratmaq dövlətin işidir. İş adamına pul qazanmaq imkanı yarat, o on minlərlə iş yeri yaradacaq. O, iş yerini ona görə yaratmayacaq ki, xalqa yazığı gələcək, hökumətə kömək etmək istəyəcək. Yox, sadəcə o pulunu çoxaltmaq, sandıqlarını doldurmaq istəyəcək. Bu onun yaranışdan haqqıdır. Daha çox qazanacaq, daha çox iş yeri yaradacaq, daha çox vergi və rüsum ödəyəcək, həm də rüsum ha, ödəniş yox. İş adamlarının da daha çox qazanmasına qısqanclıq etmək olmaz, etsək inkişaf etməyəcəyik. Əksinə, sevinək ki, qoy bizim də halal yolla milyonçu və milyarder olmuş iş adamlarımız var.