Bu müəssisələrə iki milyon manatdan artıq kredit verilib - Nazirdən PAYLAŞIM

"Sahibkarlığın İnkişafı Fondu tərəfindən yerli istehsalın təşviqi və sahibkarlara dəstək məqsədilə əlcək istehsalı ilə məşğul olan "Xanni-2017” MMC-yə 2 mln. manat və meyvə-tərəvəz məhsullarının emalı üzrə ixtisaslaşmış "Brightman BMC” MMC-yə 100 min manat güzəştli kredit verilib", - Cabbarov söyləyib.

 

Azərbaycanın ilk əlcək istehsalçısı olan "Xanni-2017” MMC 2017-ci ildə Gəncədə fəaliyyətə başlayıb. "Brightman BMC” MMC isə kənd təsərrüfatı məhsullarının emalı ilə məşğuldur.

 

2022-ci ilin 4 ayında ərzində Sahibkarlığın İnkişafı Fondu tərəfindən 757 layihənin icrasına güzəştli kredit ayrılıb. Cari ilin əvvəlindən mayın 1-i tarixinədək təqdim edilən layihələrin maliyyələşdirilməsinə 29,8 milyon manat güzəştli kredit verilib. Kredit verən 5 müvəkkil kredit təşkilatının siyahısına "AccessBank", "Bank Respublika", "Unibank", "Yelo Bank" və "Aqrarkredit" daxildir.

 

"Azərbaycan Respublikası Sahibkarlığın İnkişafı Fondunun vəsaiti hesabına güzəştli kreditlərin verilməsi Qaydası”na əsasən kreditin ayrılması üçün sahibkarlıq subyektləri rəsmi qaydada aidiyyəti sənədləri təqdim etməklə yalnız müvəkkil kredit təşkilatlarının baş ofisinə və ya filiallarına müraciət edə bilərlər. Kiçikhəcmli kreditlər: 5.000 manatdan 50.000 manatadək; ortahəcmli kreditlər: 50.001 manatdan 1.000.000 manatadək; böyükhəcmli kreditlər: 1.000.001 manatdan 10.000.000 manatadəkdir. Kiçikhəcmli kreditlər üçün - 3 (üç) ilədək; ortahəcmli kreditlər üçün - 5 (beş) ilədək; böyükhəcmli kreditlər üçün -10 (on) ilədək verilir.