Türk dövlətləri arasında yük daşımaları 70% artacaq

"Özbəkistan, Türkmənistan, Qazaxıstan, Qırğızıstan və Xəzər dənizinin o tayında Azərbaycan, Gürcüstan və Türkiyənin coğrafi mövqeyini nəzərə alsaq, bu, əlavə imkanlar yaradır. Artıq qeyd etdiyimiz kimi, ölkələrimiz arasında yüklərin tranziti artır. Mövcud məlumata görə, bu il 70% artacaq, gələn il isə bu rəqəm daha da yüksək ola bilər. Bütün bu yüklər Transxəzər marşrutu ilə Mərkəzi Asiyadan Avropaya gedir”, - Əliyev cümə günü "Orta dəhliz boyu: geosiyasət, təhlükəsizlik və iqtisadiyyat” beynəlxalq konfransında bildirib.

Əliyev ikitərəfli ticarətin artırılması üçün yeni imkanların olduğunu vurğulayıb.

"Hazırda Türkiyə ilə gömrük rüsumlarından azad ediləcək malların siyahısını genişləndirmək və azad ticarət sazişi imzalamaq üzərində işləyirik. Azərbaycanla Türkiyə arasında ticarət dövriyyəsi artıq 4 milyard dolları ötüb, digər ölkələrlə də artımın olduğunu görürük. Vacib addım odur ki, digər aparıcı oyunçular da bu marşrutu etibarlı, təhlükəsiz və iqtisadi cəhətdən cəlbedici hesab edir", -  prezident əlavə edib.

Dövlət başçısı onu da qeyd edib ki, tarif siyasətinin unifikasiyası, gömrük strukturlarının fəaliyyətinin əlaqələndirilməsi üzərində daha çox işləmək lazımdır ki, şirkətlər bu dəhlizdən təkcə vaxta deyil, həm də vəsaitə qənaət etsinlər.