Quş əti və yumurta istehsalçıları hökumətdən yerli bazarı qorumağı xahiş edib

Assosiasiyanın məlumatında qeyd olunur ki, bu gün yerli istehsalçılar yerli bazarı yumurta ilə 130-140%, toyuq əti ilə isə  100% təmin edir. 

"Buna baxmayaraq, bəzi şirkətlər Azərbaycana istehsal tarixi göstərilməyən süfrə yumurtaları, eləcə də bir günlük cücələrin tədarükünü həyata keçirir. Eyni zamanda, idxalçı ölkələr yerli istehsalçıların maraqlarını qorumaq üçün tədbirlər gördüyündən Azərbaycan  istehsalçıları məhsul ixracında çətinliklər yaşayırlar",  -  assosiasiyadan bildirilib.

Bununla bağlı  Azərbaycanın baş nazirinə, iqtisadiyyat və kənd təsərrüfatı nazirliklərinə yerli bazarın qorunması üçün lazımi addımların atılması xahişi ilə müraciət edilib.

O cümlədən, assosiasiya Azərbaycana növbəti kəsim üçün birgünlük toyuqların idxalına əlavə rüsumun tutulmasını, möhür və istehsal tarixi olmayan süfrə yumurtalarının ölkəyə gətirilməsinin qarşısının alınmasını, habelə bu məhsulların idxalı zamanı nəzarət sənədlərinin sayının artırılmasını təklif edir.