SOCAR Macarıstan qaz anbrlarına qaz vurmağa başlayıb

"Şad xəbər var. Azərbaycanın enerji şirkəti SOCAR müqaviləyə uyğun olaraq ilk 50 milyon kubmetr qazı Macarıstanın qaz anbarlarına vurub", - Siyarto Facebook-da yazıb.

İyulun əvvəlində Siyarto bildirib ki, Macarıstan və Azərbaycan 50 milyon kubmetr həcmində qazın saxlanmasına dair müqavilə imzalamağa hazırlaşır. Lakin sənədin imzalanma tarixi barədə məlumat verilməyib.

Daha əvvəl xəbər verildiyi kimi, iyunun 2-də SOCAR və Macarıstanın MVM CEEnergy şirkəti Azərbaycan qazının Macarıstana ixracına dair müqavilə imzalayıb və Macarıstanın qaz anbarlarından istifadə üzrə əməkdaşlıq məsələlərini müzakirə ediblər.

Alqı-satqı müqaviləsi bu ilin sonunadək Azərbaycandan Macarıstana 100 milyon kubmetr qazın tədarükünü nəzərdə tutur. Təchizatların başlanması 2023-cü ilin dördüncü rübünə planlaşdırılır.

2022-ci ildə Azərbaycan qaz ixracını 18%, yəni  22,3 milyard kubmetrədək artırıb, Avropaya tədarük 11,4 milyard kubmetr (+39%) təşkil edib.

2023-cü ildə Azərbaycandan 24,5 milyard kubmetr qaz ixracı planlaşdırılır ki, bunun da təxminən 12 milyard kubmetri Avropayadır.

Hazırda Avropada Azərbaycan qazının alıcıları İtaliya, Yunanıstan, Bolqarıstan və Rumıniyadır.