Azərbaycanda 2024-cü ildə illik inflyasiya hədəf diapazonunda olacaq - Mərkəzi Bank

Mərkəzi Bankın uçot dərəcəsi ilə bağlı açıqlamasında bildirilir ki, bank mövcud makroiqtisadi vəziyyəti nəzərə alaraq 2024-cü il üçün inflyasiya proqnozunu dəyişməz saxlayıb.

"Ümumiyyətlə, inflyasiyanın artması və enməsi riskləri bir-birini tarazlaşdırır. Bu səbəbdən 2024-cü il üçün inflyasiya proqnozunu dəyişməz saxladıq. 2024-cü ildə illik inflyasiyanın hədəf dəhliz daxilində olacağını gözləyirik”, -  Mərkəzi Bankdan bildirilib.

Bankın məlumatına görə, 2023-cü ildə Azərbaycanda illik (12 aylıq) inflyasiya 2,1% təşkil edib və hədəf diapazonunun aşağı hissəsində (4±2%) olub.

"2023-cü ildə istehlak səbətinə daxil olan bütün mal qrupları üzrə inflyasiyada azalma müşahidə olunub. Ümumilikdə, 2023-cü ildə ərzaq məhsulları üzrə illik inflyasiya 0,8%, qeyri-ərzaq məhsulları üzrə 2,7%, xidmətlər üzrə 3,7% təşkil edib”, - məlumatda qeyd olunur.

Mərkəzi Bank vurğulayır ki, 2023-cü ilin dördüncü rübündə inflyasiyanın artacağını gözləyən ev təsərrüfatlarının sayı keçən ilin üçüncü rübünün sonundakı 81 faizdən 69 faizə enib.

Azərbaycanda orta illik inflyasiya 2022-ci ildəki 13,9 faizdən 2023-cü ildə 8,8 faizə enib.

Azərbaycanın İqtisadiyyat Nazirliyi 2024-cü il üçün ölkədə orta illik inflyasiyanın 5,3% səviyyəsində olacağını proqnozlaşdırır.