“Azərkosmos”un ixrac gəlirləri azalıb

2025-ci ilin birinci rübündə Rəqəmsal İnkişaf və Nəqliyyat Nazirliyi yanında Kosmik Agentlik (“Azərkosmos”) 4 milyon ABŞ dolları dəyərində peyk telekommunikasiya xidmətləri ixrac edib. Bu da ötən ilin eyni dövrü ilə müqayisədə təxminən 14,9 % azdır.

Bu barədə İqtisadi İslahatların Təhlili və Kommunikasiya Mərkəzinin açıqladığı “İxrac İcmalı”nın aprel sayında bildirilir.

3 ayda peyk telekommunikasiya xidmətlərini 39 ölkədən 100-ə yaxın şirkət idxal edib. 1 il əvvələ nisbətən ölkələrin sayı 8 vahid azalıb. Əsas ixrac istiqamətləri Böyük Britaniya (1 milyon ABŞ dolları), Lüksemburq (890,3 min ABŞ dolları), Nigeriya (213,4 min ABŞ dolları), Misir (179 min ABŞ dolları) və Pakistan (174 min ABŞ dolları) olub.

Təkcə martda isə “Azərkosmos” 1,3 milyon ABŞ dollar dəyərində peyk telekommunikasiya xidmətləri ixrac edib. Bu isə illik müqayisədə 23,5 % azdır.

2024-cü ilin ilk 10 ayında Rəqəmsal İnkişaf və Nəqliyyat Nazirliyi yanında Kosmik Agentlik ("Azərkosmos") 50 ölkəyə 15,4 milyon ABŞ dolları dəyərində peyk telekommunikasiya xidmətləri ixrac edib ki, bu da ötən ilin eyni dövrünün göstəricisindən 4,3% azdır.

Təkcə oktyabrda  "Azərkosmos” 40 ölkəyə 1,6 milyon ABŞ dolları dəyərində xidmət ixrac edib.