SOFAZ İtaliyada Enfinity-nin günəş enerjisi aktivlərinin 49 faizini alacaq

Azərbaycanın Dövlət Neft Fondu (SOFAZ) İtaliyada günəş enerjisi sahəsindəki investisiyalarını genişləndirmək məqsədilə ABŞ-ın Enfinity Global Inc. şirkətinin aktivlərində 49 faizlik pay alacaq.

Sövdələşməyə əsasən, SOFAZ Enfinity-yə məxsus 402 meqavatlıq portfelin 49 faizini əldə edəcək. Bu portfelə İtaliyanın Latsio və Emiliya-Romanya bölgələrində yerləşən 14 günəş elektrik stansiyası (həm istismarda olan, həm də inşası davam edən layihələr) daxildir. Layihələr uzunmüddətli enerji alqı-satqı müqavilələri ilə təmin olunub. Enfinity şirkəti isə nəzarət payını saxlayacaq.

“Bu investisiya İtaliyada yeni layihələrin inkişafını maliyyələşdirməyə imkan verəcək,” – Enfinity-nin baş direktoru Karlos Domeneç bildirib. “Bərpa olunan enerji bazarında hələ də böyük inkişaf potensialı var.”

Hazırda SOFAZ-ın infrastruktur, daşınmaz əmlak, səhmlər və digər aktivlər daxil olmaqla 60 milyard dollarlıq investisiya portfeli mövcuddur.

“Bu, İtaliyada və daha geniş Avropada bərpa olunan enerji sahəsində mövcudluğumuzu genişləndirmək üçün atılan ilk addımdır,” –  SOFAZ-ın icraçı direktoru İsrafil Məmmədov vurğulayıb.

N.Təbrizli