Daşkəsən yataqlarında əlavə 70 milyon ton dəmir filizi ehtiyatı aşkarlanıb

Azərbaycanın Daşkəsən dəmir filizi yataqlarında aparılan geoloji tədqiqatlar nəticəsində ehtiyatlar 70 milyon ton artaraq ümumilikdə 187,3 milyon tona çatıb. Bu barədə “AzerGold” QSC-nin İdarə Heyətinin sədri Zakir Ibrahimov məlumat verib. 

“AzerGold”a məxsus “Daşkəsən Dəmir Filiz” MMC-nin həyata keçirdiyi layihə iki əsas hissədən ibarətdir. Bu  zənginləşdirmə və pellet istehsalı zavodunun tikintisi, eləcə də illik 2 milyon ton gücü olan isti briketlənmiş dəmir (İBD) zavodunun qurulması daxildir.

Layihənin ümumi dəyəri təqribən 1,2 milyard ABŞ dolları təşkil edir. 

Hazırda ilk mərhələ üzrə bank təyinatlı texniki-iqtisadi qiymətləndirmə aparılır.

İkinci mərhələnin icrası üçün Qazaxıstanın “Fonte GreenMet Investments Fund” şirkəti ilə birgə müəssisə — “Azerbaijan Metal Company” MMC təsis olunub.

Layihə ölkə iqtisadiyyatına ildə 694 milyon dollar töhfə verəcək, 1600 birbaşa və ümumilikdə 4000 iş yeri yaradılacaq.

Aytac Zeynalova