Pomidor ixracı 2025-ci ilin səkkiz ayında 23%-ə yaxın artıb

2025-ci ilin səkkiz ayında Azərbaycanın pomidor (tomat) ixracı ötən ilin müvafiq dövrü ilə müqayisədə 23,1% artaraq 143 994,9 ton təşkil edib. Bu barədə Dövlət Gömrek Komitəsindən bildirilib.

Bu dövrdə ixrac olunan pomidorun statistik dəyəri 157,15 milyon ABŞ dolları olub. Müqayisə üçün, 2024-cü ilin ilk səkkiz ayında ixrac həcmi 116 951,5 ton, dəyəri isə 139,55 milyon dollar təşkil edib.

Bu göstərici Azərbaycan kənd təsərrüfatı məhsullarının ixrac potensialının artdığını nümayiş etdirir.

Pomidor Azərbaycan kənd təsərrüfatında ən yüksək ixrac potensialına malik məhsullardan biridir. Əsas ixrac bazarları arasında Rusiya, Gürcüstan və BƏƏ yer alır. Ölkədə son illərdə istixana sahələrinin genişləndirilməsi pomidor istehsalını və ixracını əhəmiyyətli dərəcədə artırıb.

Gülnar Nazimqızı