İşğaldan azad edilən ərazilərə şamil olunan vergi güzəştləri Naxçıvanda da tətbiq ediləcək — DVX rəsmisi

İşğaldan azad edilən ərazilərdə fəaliyyət göstərən sahibkarlara tətbiq olunan bütün vergi güzəştləri Naxçıvan Muxtar Respublikasına da şamil ediləcək. Bu barədə Milli Məclisdə Vergi Məcəlləsinə təklif edilən dəyişikliklərin müzakirəsi zamanı Dövlət Vergi Xidmətinin Vergi siyasəti baş idarəsinin rəisi Nicat İmanov məlumat verib.

Onun sözlərinə görə, Naxçıvan Muxtar Respublikası üçün də eyni güzəşt rejimi müəyyən edilir və bu addım regionun iqtisadi fəallığını artırmaq, sahibkarlıq mühitini canlandırmaq məqsədi daşıyır.

“İşğaldan azad olunmuş ərazilərə tətbiq edilən bütün vergi güzəştləri Naxçıvan Muxtar Respublikasına da şamil olunacaq. Bu, regionda biznesin inkişafına və yeni investisiyaların cəlb edilməsinə xidmət edəcək,” – İmanov bildirib.

Rəsmi açıqlamaya görə, bu qərar Naxçıvanın iqtisadiyyatının dirçəldilməsi, yerli sahibkarların dəstəklənməsi və vahid vergi siyasətinin ölkə üzrə tətbiqi istiqamətində atılmış mühüm addımdır.

Qanun layihəsinə əsasən, güzəştlər 2026-cı ilin yanvarın 1-dən qüvvəyə minəcək.

N.Təbrizli