bp-nin yeni CEO-su Meg O’Neill təyin olunub

Neft, qaz və bərpa olunan enerji şirkəti bp, 1 aprel 2026-cı il tarixindən etibarən Meg O’Neill-in baş icraçı direktor (CEO) vəzifəsinə təyin olunacağını açıqlayıb. Bu barədə şirkətdən bildirilib. 

Məlumata görə, bp-nin hazırkı CEO-su Murray Auchincloss vəzifəsindən ayrılacaq. Auchincloss problemsiz keçid prosesini təmin etmək üçün 2026-cı ilin dekabr ayınadək şirkətlə məsləhətçi qismində əməkdaşlıq edəcək.

Meg O’Neill hazırda Avstraliyanın beynəlxalq enerji şirkəti Woodside Energy-də CEO vəzifəsini icra edir. O’Neill 1 aprel 2026-cı ildən bp-də baş icraçı direktor olaraq fəaliyyətə başlayacaq, bu müddətədək isə şirkətin Təchizat, Ticarət və Nəqliyyat üzrə vitse-prezidenti Carol Howle müvəqqəti CEO funksiyasını icra edəcək.

bp-nin İdarə Heyətinin sədri Albert Manifold O’Neill-in təyinatından məmnunluğunu ifadə edib və Auchincloss-a şirkətə verdiyi töhfələrə görə təşəkkür edib. O’Neill isə şirkətin fəaliyyət göstəricilərini yaxşılaşdırmaq, innovasiya və dayanıqlılığı təşviq etmək, dünya üzrə enerji ehtiyaclarını qarşılamaq üçün üzərinə düşəni etməyə hazır olduğunu bildirib.