TAP boru kəməri ildə 1,2 milyard kubmetr əlavə qaz nəql edə biləcək

Trans-Adriatik Boru Kəməri (TAP) 2026-cı ilin yanvarın 1-dən etibarən ildə əlavə 1,2 milyard kubmetr təbii qaz nəql etmək gücünə çatıb. Bu barədə Azərtac boru kəmərinin operatoru TAP AG-a istinadla yazıb. 

Layihə çərçivəsində Türkiyə-Yunanıstan sərhədində yerləşən Kipoi Kompressor Stansiyasında genişləndirmə işləri başa çatdırılıb. 2024-cü ilin yanvarında başlayan işlər büdcə çərçivəsində, qaz axınlarına fasilə vermədən tamamlanıb. Təkmilləşdirmə işlərinə 15 MVt gücündə yeni kompressor qurğusunun quraşdırılması və mövcud qurğuların yenilənməsi daxildir.

TAP 31 dekabr 2020-ci ildən kommersiya qaz nəqlinə başlayıb və ötən 5 il ərzində Avropaya 54 milyard kubmetrdən çox Azərbaycan qazı çatdırıb.

Boru kəməri Xəzər dənizinin Azərbaycan sektorundakı “Şahdəniz” yatağından çıxarılan qazı TANAP vasitəsilə Türkiyə-Yunanıstan sərhədinə gətirir və Yunanıstan, Albaniya, Adriatik dənizi boyunca İtaliyanın cənubuna çatdırır. Kəmərin uzunluğu 878 km, diametri isə 48 düymdür.

Aytac