Zəngəzur dəhlizi 2030-cu ilə açıla bilər - nazir

224 kilometrlik Qars–İğdır–Aralık–Dilucu dəmir yolu xətti Zəngəzur dəhlizi layihəsi baxımından mühüm əhəmiyyət kəsb edir və xəttin tikintisi ötən ildən davam edir. Bunu Türkiyənin nəqliyyat və infrastruktur naziri Əbdülqadir Uraloğlu bildirib.

Nazirin sözlərinə görə, Zəngəzur dəhlizi marşrutu üzrə işlər Azərbaycan ərazisində də paralel şəkildə aparılır. O əlavə edib ki, dəhlizin Ermənistan ərazisindən keçən hissəsinin tikintisində ABŞ-ın iştirak etməsi məsələsi gündəmdədir.

“Bu il bu istiqamətdə irəliləyiş gözləyirik. Bu da Zəngəzur dəhlizinin 2030-cu ilə qədər istismara verilməsinə imkan yarada bilər”, –  Uraloğlu jurnalistlərə bildirib.

Zəngəzur dəhlizi Azərbaycanı Naxçıvanla birləşdirməyi, eyni zamanda Türkiyə ilə birbaşa dəmir yolu əlaqəsi yaratmağı hədəfləyən regional nəqliyyat layihəsidir. Layihə Cənubi Qafqazda logistika, ticarət və geosiyasi balans baxımından strateji əhəmiyyət daşıyır və beynəlxalq aktorların diqqət mərkəzindədir.

Gülnar