Azərbaycanın bank sektoru 2025-i aktiv və kredit artımı ilə başa vurub

31 dekabr 2025-ci il tarixinə Azərbaycanda fəaliyyət göstərən 22 bankın filiallarının sayı 502, şöbələrinin sayı 87, ATM-lərin sayı isə 3 486 olub. Bu barədə Mərkəzi Bankdan bildirilib.

Bank sektorunda çalışanların sayı hesabat ayında 1,4% (369 nəfər) artaraq 27 389 nəfərə, ilin əvvəlindən isə 8% (2 026 nəfər) yüksəlib.

Rəsmi statistikaya görə, bank sektorunun cəmi aktivləri 57 086,2 mln. manat, cəmi öhdəlikləri 49 743,7 mln. manat, balans kapitalı isə 7 342,5 mln. manat təşkil edib. 2025-ci il ərzində bankların aktivləri 7,7%, öhdəlikləri 7,2%, balans kapitalı isə 11% artıb.

Hesabat ayında bankların kredit portfeli 1,3% (377,5 mln. manat) genişlənərək 30 063 mln. manata çatıb. Kredit portfelinin strukturunda biznes kreditləri 53,6% (16 106,3 mln. manat) ilə üstünlük təşkil edib. İstehlak kreditlərinin payı 31,1% (9 354,2 mln. manat), ipoteka kreditlərinin payı isə 15,3% (4 602,5 mln. manat) olub.

Ümumilikdə, 2025-ci il ərzində kredit portfeli 9,4% və ya 2 585,4 mln. manat artıb. Artımın 1 319,1 mln. manatı biznes, 909,3 mln. manatı istehlak, 357 mln. manatı isə ipoteka kreditlərinin payına düşüb.

Bankların öhdəliklərinin strukturunda depozit portfeli əsas payı qoruyub — cəmi öhdəliklərin 76,8%-i və ya 38 221,9 mln. manat. Depozitlərin 57,3%-i (21 898,4 mln. manat) hüquqi şəxslərin, 42,7%-i (16 323,5 mln. manat) isə fiziki şəxslərin depozitlərindən ibarət olub.

Gülnar Nazimqızı