Azərbaycanda ani ödənişlərin payı 54%-ə yüksəlib

Azərbaycanda ani ödənişlərin ümumi rəqəmsal ödənişlərdə payı 54%-ə çatıb. Bunu Azərbaycan Mərkəzi Bankı sədrinin müavini Vüsal Xəlilov bildirib.

Onun sözlərinə görə, bu göstərici ölkədə rəqəmsal ödəniş ekosisteminin sürətlə inkişaf etdiyini və nağdsız ödənişlərə keçidin dərinləşdiyini göstərir.

Xəlilov qeyd edib ki, Mərkəzi Bank ani ödəniş sisteminin funksionallığının və texniki imkanlarının genişləndirilməsi istiqamətində işləri davam etdirir. Bu sistem bank hesabları arasında 24/7 rejimində əməliyyatların aparılmasına imkan verir. 

Onun sözlərinə görə, rəqəmsal ödənişlərin inkişafı ilə yanaşı, açıq bankçılıq, QR ödənişləri və yeni fintex həllərinin tətbiqi də maliyyə sektorunun əsas prioritetlərindən biridir. 

Mərkəzi Bank rəqəmsal maliyyə xidmətlərinin genişləndirilməsi və ödəniş infrastrukturunun modernləşdirilməsi istiqamətində islahatları davam etdirir.

N.Təbrizli