Neft gəlirlərdən asılılıq azalır - Maliyyə naziri

Azərbaycanın neft gəlirlərindən asılılığı azalmaqda davam edir, cari xərclərin qeyri-neft gəlirləri hesabına maliyyələşdirilməsi üzrə göstərici 2025-ci ildə 92%-ə çatıb. Bunu maliyyə naziri Sahil Babayev Milli Məclisdə çıxışı zamanı bildirib.

Nazirin sözlərinə görə, bu göstərici proqnozdan 7,5 faiz bəndi çoxdur.

 Hökumətin 2029-cu il üçün hədəfi cari xərclərin tam şəkildə, yəni 100% qeyri-neft gəlirləri hesabına örtülməsidir.

Babayev bildirib ki, icmal büdcədə qeyri-neft gəlirlərinin payı 55,2% təşkil edib. Bu, 2024-cü illə müqayisədə 2,8 faiz bəndi çoxdur. 

2029-cu ilədək bu göstəricinin 69%-ə çatdırılması hədəflənir.

Onun sözlərinə görə, icmal büdcənin qeyri-neft gəlirlərinin qeyri-neft ÜDM-ə nisbəti 28,7% olub.

Nazir bildirib ki, icmal büdcənin qeyri-neft baza kəsiri qeyri-neft ÜDM-in 18,6%-i səviyyəsində formalaşıb. 

Bu, müəyyən edilmiş hədəf göstəricisindən 3,5 faiz bəndi, 2024-cü illə müqayisədə isə 1,4 faiz bəndi azdır.

“Bu göstəricilər neft gəlirlərindən asılılığın mərhələli şəkildə azaldığını və fiskal dayanıqlığın gücləndiyini göstərir,” Babayev bildirib.

Nazirin sözlərinə görə, büdcə xərcləri səmərəli, ünvanlı və mövcud ehtiyaclara uyğun şəkildə icra olunub.
Babayev qeyd edib ki, regionların dövlət büdcəsindən asılılığı da azalmaqda davam edir.

Gülnar Nazimqızı