Neft qiymətlərindəki dəyişikliklər hələlik proqnozlara təsir etməyib

Yaxın Şərqdəki geosiyasi hadisələrin təsiri ilə neft qiymətlərində müşahidə olunan dəyişikliklər hələlik Azərbaycanın iqtisadi proqnozlarına təsir göstərməyib. Bunu Azərbaycan Mərkəzi Bankının (AMB) Statistika departamentinin direktoru Samir Nəsirov tədiyə balansının açıqlanmasına həsr olunmuş brifinqə deyib.

Onun sözlərinə görə, ilin əvvəlində neft tədarükləri üzrə bir sıra fyuçers müqavilələri əvvəlcədən imzalandığından qiymət dəyişikliklərinin təsiri dərhal hiss olunmayıb.

"Mart, aprel və may ayları üzrə fyuçers müqavilələri daha əvvəl bağlanmışdı. Neft qiymətlərində sonrakı yüksəliş əsasən ilin ikinci və üçüncü rüblərinə təsadüf edib", - o qeyd edib.

Nəsirov bildirib ki, hazırda Yaxın Şərqdə baş verən hadisələrin fonunda neft bazarında müəyyən ucuzlaşma meyilləri müşahidə olunur. Bununla belə, qiymətlərin gələcək istiqamətini proqnozlaşdırmaq çətindir.

"Neft qiymətlərinin gələcək dinamikasını dəqiq proqnozlaşdırmaq mümkün deyil. Bu, əsasən geosiyasi amillərdən asılıdır. Mövcud tendensiya davam edərsə, orta qiymət göstəricilərinə müəyyən təsir göstərə bilər", - o vurğulayıb.

O əlavə edib ki, hazırda neft qiymətləri ilə bağlı mövcud proqnozlarda və makroiqtisadi göstəricilərdə dəyişiklik yoxdur.

"Qiymət dəyişikliklərinin iqtisadi göstəricilərə təsiri ilə bağlı hər hansı yenilənmə olarsa, bu barədə ictimaiyyətə məlumat veriləcək", - o bildirib.

Gülnar Nazimqızı