VIG Re: Enerji dəhlizlərinin uğuru risklərin düzgün idarə edilməsindən asılıdır

Trans-Xəzər Enerji Dəhlizi və Qara Dəniz Enerji Birləşdiricisi kimi strateji layihələrin uğuru yalnız enerji ötürülməsinin başlaması ilə ölçülməməlidir. Bunu VIG Re-nin Mərkəzi və Şərqi Avropa və Beynəlxalq Bazarlar üzrə Baş Anderrayteri Dmitri Qamankov Azərbaycan Beynəlxalq Sığorta Forumunda səsləndirib.

Onun sözlərinə görə, belə layihələrin davamlılığı investor etimadının formalaşdırılması və risklərin erkən mərhələdə effektiv şəkildə idarə olunmasından birbaşa asılıdır.

Dmitri Qamankov bildirib ki, sığorta və təkrarsığorta sektoru yalnız baş vermiş hadisələrin nəticələrini qiymətləndirməklə kifayətlənməməli, layihələrin planlaşdırılması mərhələsindən etibarən risklərin qarşısının alınmasına yönəlməlidir.

O qeyd edib ki, potensial təhlükələrin mənbələrinin əvvəlcədən müəyyənləşdirilməsi, qeyri-müəyyənliklərin azaldılması və dayanıqlı risk idarəetmə sisteminin yaradılması iri infrastruktur layihələrinin uğurlu icrası üçün vacib şərtlərdəndir.

Qamankovun fikrincə, enerji dəhlizləri yalnız enerji təhlükəsizliyinə xidmət etmir. Bu təşəbbüslər regionlararası inteqrasiyanı gücləndirir, rəqəmsal əlaqələrin inkişafına təkan verir və müxtəlif bazarlar arasında əməkdaşlıq imkanlarını genişləndirir.

O vurğulayıb ki, bazar iştirakçıları sığorta hadisələrindən sonrakı mübahisələr və ödəniş prosesləri ilə məhdudlaşmaq əvəzinə, layihələrin hazırlıq mərhələsində risklərin idarə olunması üzrə həllər təqdim etməlidirlər.

VIG Re rəsmisinin sözlərinə görə, Trans-Xəzər Enerji Dəhlizi və Qara Dəniz Enerji Birləşdiricisi layihələri yalnız elektrik enerjisinin ötürülməsinə başlanıldıqdan sonra deyil, investisiyaların düzgün istiqamətləndirilməsi və layihələrin dayanıqlı maliyyə mexanizmləri ilə təmin olunması halında həqiqi uğur qazanmış hesab edilə bilər.

Aytac