Əhməd Yaşar: Qarabağdakı layihələrin sığortalanması ilə bağlı məlumat bazası yaradılır

Azərbaycanın işğaldan azad edilmiş ərazilərində həyata keçirilən layihələrin sığortalanması üzrə məlumat bazasının yaradılması istiqamətində işlərə başlanılıb.

Bunu Türkiyə Sığorta Birliyinin sədri Əhməd Yaşar Bakıda keçirilən Azərbaycan Beynəlxalq Sığorta Forumunda jurnalistlərə açıqlamasında bildirib.

Onun sözlərinə görə, hazırda Qarabağ və digər azad edilmiş ərazilərdə həyata keçirilən layihələr üzrə sığorta xidmətlərindən geniş şəkildə istifadə olunur, lakin bu sahə ilə bağlı dəqiq statistik məlumatlar hələ formalaşdırılmayıb.

“Hazırda əlimdə bu məsələyə dair konkret rəqəmlər yoxdur. Lakin burada fəaliyyət göstərən iri tikinti şirkətlərinin nümayəndələri ilə görüşlərimiz olub. Qarabağda çoxsaylı türk tikinti şirkətləri müxtəlif layihələr həyata keçirir. Bu layihələrin sığortalanması əsasən Azərbaycanda həyata keçirilsə də, Türkiyə sığorta şirkətləri də prosesə dəstək verirlər”, –  o qeyd edib.

Yaşar vurğulayıb ki, həyata keçirilən layihələrin risk həcmi və tələb olunan sığorta tutumu yalnız yerli və ya Türkiyə sığorta bazarlarının imkanları ilə tam qarşılanmır. Bu səbəbdən beynəlxalq təkrarsığorta bazarlarının imkanlarından da istifadə edilir.

Türkiyə Sığorta Birliyinin sədri əlavə edib ki, Türk Dünyası Sığorta Birliyi çərçivəsində hesabatlılıq sisteminin qurulması və vahid məlumat bazasının formalaşdırılması vacibdir.

“Bunun üçün müvafiq məlumatların toplanması istiqamətində işlərə başlamışıq”, – Əhməd Yaşar bildirib.

Aytac