Fatmayıda bağ evlərindən antik əşyalar oğurlayan şəxslərə hökm oxundu

Bakının Binəqədi rayonu Fatmayı bağlar massivində yerləşən fərdi yaşayış evlərindən antik əşyalar və məişət texnikası oğurlamaqda təqsirləndirilən Fuad Babayev və Samir Müseyibovun (ad və soyadlar şərtidir) məhkəmə prosesi başa çatıb. Bu barədə "Qafqazinfo" xəbər verir. 

Məhkəmə materiallarına əsasən, hər iki şəxs Fatmayıda iki bağ evinə qanunsuz daxil olaraq ümumi dəyəri minlərlə manat təşkil edən qədim samovar, elektronika və digər qiymətli əşyaları oğurlayıb, daha sonra onları paytaxtın mərkəzindəki antikvar mağazalarına və təkrar bazar satıcılarına satıblar. Zərərçəkənlərdən biri evə bir il getmədiyini, sonradan 4 min manatlıq qədim samovarının və qiymətli əşyalarının oğurlandığını aşkar etdiyini bildirib. 

Məhkəmə prosesində təqsirləndirilən 33 yaşlı Samirin Vətən müharibəsi iştirakçısı və medallı qazi olduğu, ilk dəfə cinayət törətdiyi, Fuadın isə əvvəllər də məhkumluq həyatı yaşadığı nəzərə alınıb. Binəqədi Rayon Məhkəməsinin hökmü ilə F.Babayev 2 il müddətinə azadlıqdan məhrumetmə, S.Müseyibov isə elektron qolbaq tətbiq edilməklə 2 il 6 ay müddətinə azadlığın məhdudlaşdırılması cəzasına məhkum edilib.