bp “Mərkəzi Azəri” platformasında profilaktik işləri vaxtından əvvəl yekunlaşdırıb

“Azəri-Çıraq-Dərinsulu Günəşli” (AÇG) yatağının işlənməsi layihəsinin əməliyyatçısı olan “bp” şirkəti “Mərkəzi Azəri” platformasında profilaktik işlər proqramının vaxtından əvvəl və uğurla başa çatdığını elan edib.

AÇG-nin illik iş planına uyğun olaraq avqustun 19-dan etibarən 11 gün ərzində icra edilən texniki xidmət tədbirləri tam təhlükəsiz şəkildə həyata keçirilib. Hazırda platformada hasilatın tədrici artırılması və əvvəlki səviyyəyə çatdırılması prosesi davam edir.

Məlumata görə, proqram çərçivəsində vacib bütövlük və texniki baxış işləri, məşəl sisteminin təkmilləşdirilməsi, əməliyyat etibarlılığının artırılması və anomaliyaların aradan qaldırılması tədbirləri görülüb. Həmçinin, mövcud quyulardan neftvermə əmsalını artırmaq və qazın yenidən laya vurulma gücünü gücləndirmək məqsədi daşıyan “Mərkəzi Azəri Qaz Genişləndirilməsi” (CAGE) layihəsi üzrə nəzərdə tutulmuş işlər də icra olunub.